128蚊任食Pizza 抵咩？

拍拖拍到咁上下，唔知點解出街見面，永遠一問到「今晚食乜」就口啞啞。阿潮雖不揀飲擇食，但BB豬永遠就好似想食盡人世間的珍饈百味咁，次次都要試新嘢。

好啦，今次BB豬又有新花樣，話要去Pizza Hut食放題。

阿潮以為上次的燒味壽司已經可以WIN WIN雙贏，你食你的壽司，我食我的燒味。這一個意大利放題，阿潮一聽到就已經打左個突。

明知Pizza同壽司有異曲同工之妙，都係用金字塔最底個層塞飽你。點知好天真好傻的BB豬仲要加多句：

任食Pizza，真係好抵食呀，你話係唔係呀BB？？

個一剎那，阿潮深深地體會到BB豬真係「食Pizza唔知Pizza 貴」。

點解？話說Pizza Hut推出這個128元任飲任食的優惠，加埋加一服務費，咁即係百四蚊啦。

BB豬見我唔多想去食，佢又開始扭計：

平時食日本放題都二百幾啦，今次百四蚊仲唔抵食？

BB豬講完依句，我都唔多想理佢。大佬，平時食日本放題，我絕對唔會叫壽司，次次都狂叫三文魚想用白飯填飽我？冇咁易！況且，俾多少少錢揀一間有焗蠔、燒海蝦食的放題，心理上點都覺得抵食啲。

但今次一睇依個「Pizza Festival」，阿潮就知一去就會中伏，點解？等我逐點話你知：

1. 除非你是小林尊

如果你唔係大胃王小林尊，阿潮絕對唔建議你去食依個「Pizza Festival」。阿潮屈指一算，就當我唔吃早餐、午餐，坐低一杯汽水都唔飲，最盡都只可以鯨吞6件Pizza，以140蚊黎計，絕對唔抵。

2. BB豬胃口太細

嬌小可人的BB豬更加唔駛講，平時食Pizza次次都淨係食有料個啲位，批邊一定遞過嚟，再加一個甜笑：

BB，你食啦，我驚你唔夠飽！

你叫我俾百四蚊去食批邊，我當然唔肯，有芝心都係咁話！

BB豬在這1.5小時裡面，阿潮已經未卜先知BB豬的戰鬥力。她會食半塊PIZZA，外加兩條意式迷你腸，仲有一杯奶茶，最後當然是另一個胃吃的甜品。

阿潮再次驚醒，再機關算盡也好，都不及有一個豬隊友（依句唔好俾BB豬睇到）。

3. 肉丸、香腸、雞翼值幾錢？

Pizza 平時單叫都要百幾二百蚊，當然令BB豬有錯覺以為Pizza 放題好抵食，但BB豬去到一定係食肉丸、香腸、雞翼。

▲ 相片來源：Facebook

咁鍾意食肉丸，去IKEA啦！早排做優惠，29蚊有15粒，雖然宜家優惠已過，每碟同樣價錢都有10粒。

▲ 相片來源：IKEA Facebook

想食腸仔？人地13蚊都有3條。再講，汽水同樣免費任飲！以BB豬的食量，再買多杯雪糕佢食，埋單都唔駛50蚊，仲唔駛加一！

▲ 相片來源：IKEA Facebook

4. 其實Pizza有大把選擇

阿潮平時食開PHD同埋PIZZA BOX，一睇個名就知有幾實惠。PIZZA BOX和PHD外賣自取都分別有7折和8折。PIZZA BOX最貴的大批是$174，7折後就大概$122。

阿潮可以應付到的半個批再加飲得唔多的飲品，相信一定岩岩好，無賺無蝕，仲可以當一次過買晒今晚晚餐，聽朝早午餐咁食。

亦都可以趁星期六、日再去攻佔759阿信屋，用7折優惠搶番一啲冷凍Pizza，再在家裡開個Pizza party，即叫即叮，絕對新鮮熱辣出爐。

不過講咁多做乜，阿潮明白「BB豬永遠是對的」的道理，我再講唔抵食BB豬就一定黑面。BB豬話：

嗰度仲會送我最鍾意食嘅泡芺呀！

阿潮梗係會捨命陪BB豬，全力以赴。其實阿潮都好欣賞今次Pizza Hut，識得用「放題」捉住一班少女心，再來一招「加送泡芺或雪糕」，一班少女又如何Say No？阿潮今晚準備去食批邊喇，都好，起碼唔駛日日食壽司。

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。